გამარჯობა,
მე გახლავართ თეიმურაზ გუგეშაშვილი, პროფესიით პედაგოგი, საქართველოს უნიკალური კუთხე რაჭიდან, კერძოდ ონიდან. მთელი ცხოვრება ვმუშაობ ხის მხატვრულ დამუშავებაზე, უფრო კონკრეტულად ძველი რაჭული წესით ვამუშავებ ხეს და ვცდილობ ეს საქმე, რომელიც დღესდღეობით ფაქტობრივად დაკარგულია, მომავალ თაობებს ვასწავლო. სწორედ ეს იყო ჩემი თბილისიდან რაჭაში დაბრუნების მიზეზი, სადაც გავხსენი სამხატვრო სკოლა, რომელშიც სულ თავიდან 5 ბავშვი იყო და დღეს 80 ბავშვამდეა. უკვე 15 წელია რაც ბავშვებს ვასწავლი, რომლებიც ჩემს ხის საამქროში იღებენ პრაქტიკულ გამოცდილებას, ამ ყველაფერში ჩემი შვილი ნიკა მიდგას გვერდში, რომელიც შეიძლება ითქვას ჩემს დაწყებულ საქმეს წარმატებით გადაიბარებს.
ამ ყველაფერზე როდესაც ვსაუბრობ, ვთვლი რომ წარმატებულად შეიძლება ჩაითვალოს, რადგან წელიწადში სულ მცირე ერთ მოსწავლეს მაინც გადავეცი ჩემი ცოდნა და ძველი რაჭული წესით ხის დამუშავება ვასწავლე. აუცილებლად უნდა ვახსენო ევროკავშირის, შვედეთის და ავსტრიის მხარდაჭერით დაფინანსებული პროექტი GRETA, რომლის მეშვეობითაც შეიძლება თამამად ვთქვა, რომ მოხდა ჩემი საქმიანობის ტექნიკურად გამართვა და მეტი მდგრადობა შეიძინა.
გრეტას შესახებ ინტერნეტიდან შეიტყო ნიკამ, ჩემმა შვილმა, შემდეგ იყო რაიონშიც შეხვედრები და პრეზენტაცია და რადგან მაღალმთიან რეგიონებში არ ვართ განებივრებული მსგავსი პროექტებით, ვიფიქრეთ რომ ეს იყო შესაძლებლობა და გადავწყვიტეთ მონაწილეობა მიგვეღო. პროექტის დაწერის და ეტაპების გავლის შემდეგ გაგვიმართლა და გავხდით ბენეფიციარები, რაც ჩვენი ხის საამქროსთვის საჭირო დანადგარებით უზრუნველყოფას ნიშნავდა. პრინციპში რა დაზგა დანადგარებიც გვაქვს, ყველაფერი გრეტას ფარგლებში მივიღეთ: სალაშინი, ჩარხები, ვერტიკალური და ჰორიზონტალური დაზგები, სახვეტი დაზგები, რეისმუსი, რომელიც დაკალიბრებას აკეთებს, გამწოვები და ყველაფერი რაც ჩვენს საამქროშია.
რამდენად შთამბეჭდავადაც გამოიყურება მიღებული დახმარება, იმდენად შთამბეჭდავია მისი შედეგები; პირველი ის რომ უფრო მეტ მოსწავლეს შეეძლება მიიღოს ჩარხებზე და დანადგარებზე პრაქტიკული სწავლება, ასევე დაინტერესების შემთხვევაში ამ დანადგარებზე უკვე სამუშაოდ დარჩება, შემდეგ ის რომ შრომა ბევრად გაგვიადვილდა და პროცესი გახდა ბევრად უსაფრთხო, შემდეგ ის რომ ეს ახალგაზრდები აღარ წავლენ საზღვარგარეთ, აქვე დასაქმდებიან, წარმოებული პროდუქციის საექსპორტო რაოდენობა გაიზრდება. რაღა დაგიმალოთ და დღესაც იმდენად მაღალი მოთხოვნა გვაქვს, გაკეთებას ვერ ვასწრებთ.
დონორების დახმარებამ შექმნა რეგიონში წარმატების მაგალითი, გააჩინა პერსპექტივა ახალი სამუშაო ადგილების შექმნის და ძირძველი ქართული ხელობის გადარჩენის. ჩემის უახლოესი გეგმებიც რასაკვირველია ამის გარშემო ტრიალებს, მინდა ეს შენობა, სადაც ახლა საამქროა მთლიანად გადავხურო, რომ აქ გავაკეთო დასარჩენები იმ სტუდენტებისთვის, რომლებიც სოფლიდან ჩამოდიან სასწავლებლად, გავაფართოო საქმიანობა, გავაცნო მთელ მსოფლიოს ტრადიციული ქართული ავეჯი, მაგალითად სამფეხა სავარძელი არავის არ აქვს ჩვენს გარდა, ასევე მინდა არ დაიკარგოს ხალხური რეწვა, ჩვენი კულტურის ეს ნაწილი და ამ მხრივ თავს უფლებას მივცემ რომ მშვიდად ვიყო, რადგან რამდენიმე მოსწავლეს შევძელი და სრულად გადავეცი ჩემი ცოდნა.
ასევე ვიტყვი რომ იმატა სწავლის მსურველთა რაოდენობამ, ასევე იმატა მასტერ კლასებზე დასწრების რაოდენობამაც, განსაკუთრებით უცხოეთიდან და ეს რეგიონისთვის არაა პატარა ამბავი. ეს ყველაფერი კი მოიტანა თავდაუზოგავმა შრომამ და თავს უფლებას მივცემ სხვა მეწარმეებს საკუთარ მაგალითზე ვუთხრა რომ არ დაყარონ ფარ-ხმალი და იშრომონ ბევრი, რადგან შრომას ნიშნავს წარმატებას!
მზად ვართ და ღია ვართ ახალი საქმიანი ურთიერთობისთვის, რომელიც ჩვენი საქმიანობის გაფართოებასა და გეგმების განხორციელებაში დაგვეხმარება. დაინტერესების შემთხვევაში დაკონტაქტება შესაძლებელია ელ-ფოსტის: nikagugeshashvili@gmail.com საშუალებით, ასევე ფეისბუქ გვერდებით „სასწავლო-სახელოსნო ოდა“ და „მხატვრის სახლი რაჭაში“.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის